Sianginn Kai Lio Mi Hna nih Theih Ding

1.      Vision: Hlawhtlingmi fimnak lam cu tinhmi (vision) ngeih a hau. Vision timi cu mit in hmuh khawh rih lomi thil cungah lungthin in rak hmuhchungnak khi a si. Fimcawnnak cu hruhnak chungin luat in thanchonak hmuh khi a si. Na hmailei luatnak le thanchonak na hmuh khawhnak hnga tinhmi (vision) ngei buin fimcawn kha a biapi tuk. Tinhmi ngei loin sianginn kai cu student si ttung i cauk ngei lo he ai khat. Tinhmi na ngei ahcun na riantuanmi cungah lungdong na hmang lai lo i, a caan phanh tikah hlawhtlingnak na hmuh lai tinak a si.

2.      Commitment (Pumpeknak): Tinhmi ngei lo ahcun i pumpeknak zong hi ngeih khawh si lo. Tinhmi na ngei hnu ahcun nai tinhmi khi pumpeknak nih a zulh a herh cang. Tinhmi lawng ngeih i mah nih i pumpeknak ngei ve lo ahcun tinhmi ngei lomi he kan i dang hlei lo. I pumpenak cu kan i tinhmi hlawhtlinh tertu a si. I pumpek timi cu a har zongah lungdong loin tuah chih, nai tinhmi tlamtlin hlan tiang teima tein tuan peng khi a si.  Ai tinhmi ah ai pumpe mi hna cu, sunghzatlaknak an ton zongah an lungdong hlei lo, thazaang laknak tu ah an hmang. Cucaah, fimnak a cawn lio hna, nai tinhmi na phanh khawhnak hnga i pumpeknak he na zuam a herh.

3.      Service (Tuahsernak): Nai tinhmi le na pumpeknak cu everyday na tuahsernak nih a fiang ter a hau. Mifim bia “thaizing ah zei na lawh lai cu nihin na tuah mi cungah aa hngat.” Paul nih, “thathumi cu rawl va pek hlah u” a ti. James zong nih, “zumhnak cu tuahnak ai tel lo ahcun a thi” a ti. Bible nih tuahsernak kongah tampi a kan cawnpiak. Tinhmi ngei buin le i pumpek buin tuahmi thil cu hmual zong a ngei khun. Mifim bia, “hlawhtlinnak timi cu harsatnak chungah lungdong lo tein a kawlmi nih cun an hmuh.” Aristotle nih a chimmi cu “ca cawnnak nih a tuah ding taktak cu a puitlingmi pum le a puitlingmi ruahnak ser hi a si” a ti. Victor Hugo nih, “minung nih kan chambau mi hi thazang si loin, tuah duhnak lungthin tu a si deuh.” Aristotle nih, “fimthiamnak cu cawlcangnak men ah a si lo, tuah lengmangmi ziaza ah a si deuh. A zuammi hna caah thil zeihmanh a si kho lo timi a um bal lo.” Nai tinhmi cu nai pumpeknak le na tuah sernak ah hmuh khawh si.

Biadongnak: Mifim pawl nih, cawnnak cu a tar bal lo an ti. Asinain, tinhmi ngeih loin fimnak cawn lengmang cu thanchonak le thathnemnak a chuahpi hlei lo. Cucaah, tinhmi ngeih buin ca cawn law, nai tinhmi tlamtlin khawhnak hnga i pumpeknak he nai zuam a herh. Nai tinhmi le nai pumpeknak cu lungdong lo tein nifate na tuan a hau.  Na cawnmi theihhngalhnak cu nifate practical in na hmang thiam a hau.

Careltu vialte cungah Pathian thluachuah um ko seh!

By: Victor Aung Thu Lin