A Theitlai in Nan Hngalh Lai

A Theitlai in Nan Hngalh Lai (Matthai 7:15-20)

Minung hi kan i dang cio nain kan hram/hrampi cu aa khat dih. Nunnak le thazaang thawnnak kan ngeihmi hi kanmah ta a si lo, Pathian ta a si. Cucaah, kan hram thawknak cu aa khat dih. Sihmanhsehlaw, kan theitlai cu a khat ti lo. Zumtu nunnak ah zei bantuk minung dah kan si ti cu kan theitlai nih a langhter.

Minung cu hmailei zei thil dah a cang lai timi kan theih khawh lo caah a luanciami tuanbia zoh in a nun ziaza ceih a si tawn. Sihmanhsehlaw, Pathian nih cun minung background a zoh lo. Amah a bochanmi hna cu an hram thawk a chia hmanh ah an donghnak theitlai cu a thlum. Cucaah, zeitindah hram na thawk timi nakin zeitindah caan na donghter; thei na tlai maw timi hi a biapi taktak mi a si. Cucaah, a tanglei bantuk zoh hna u sih:

1. Judas Iscariot cu, Bawi Jesuh kum thum chung a zulh ko nain khamhnak loin a nunnak a liam. Judas Iscariot a nun zoh tikah zeihmanh thei a tlai lo, a donghnak ah amah le amah ai thah. Nun man a ngei lo. Judas Iscariot bantuk in caan dongh ter lo hi i ralring! Zeicatiah na thih tikah na theitlai vialte cu na ruak cungah mi nih an rak chim te lai.

2. David fapa siangpahrang Solomon cu, a hramthawk ahcun, tangdor ngai in Pathian kha a upat, fimnak a hal i, Pathian nih fimnak a pek hleiah rumnak zong a chap chih. A hramthawk ahcun zeihmanh chambaunak a ngei lo. Sihmanhsehlaw, caan a rauh hnu ah Pathian kha zei rel loin a um, pathian dang kha a zulh hna. Solomon cungah Pathian a thin a hung i a ukmi ram zong cheu hnih ah ai cheu. Siangpahrang Solomon tuanbia cu zoh chia ngai in a dong. A donghnak ah Solomon nih a chimmi cu, "Pakpalawng lawngte, pakpalawng lawngte! Zeizong vialte hi pakpalawng an si ko” tiah a ti. (Phungchimtu 1:2)

3. Biakam Thar cauk tam cem a tialtu Paul cu Khrihfa hremtu a si. Zumtu kha a rak kawl hna i thonginn ah a rak khumh hna. Amah hrimhrim nih "Judah biaknak ka rak ṭanh lioah khan, zeitindah ka umtuning a rak si kha nan theih, Pathian Khrihfabu kha ka rak hrem hna i hrawh awkah fak piin ka rak i zuam" a ti (Galati 1:13). Sihmanhsehlaw, Paul cu Khrih he an i ton hnu cu, Thawngtha kilventu a si. Zumtu hna hremtu le dohtu a rak simi Paul cu, a hnu ahcun amah tu kha hremmi le dohmi ah ai cang. Paul cu a hram thawk tuanbia chia hmanh seh law, a donghnak theipar cu a thlum tuk hrinhran. Paul theitlai cu nihin ni tiang kan zulh.

A cunglei ka langhter bantuk in zeitindah kan i thawk timi nakin, zeitindah kan dongh timi hi a biapi taktak mi asi. Judas Iscariot le Solomon cu an hramthawk a tha nain a donghnak ah an tlau. An theitlai a kha (bitter) theipar a thlum lo. Paul cu a hramthawk a chia nain a donghnak ah Khrih zultu tha taktak a si. Jesuh nih theitlai dingah a kan fial, "Keimah nih kan thim hna i a hmun ding thei kha tampi in va tlai tuah u tiah kan fial hna” tiah a ti (Johan 15:16). Mi zeidah na si ti cu na theitlaimi ah hmuh kho a si. Kan hnu kum ah zeitindah na nun timi nakin tu kum 2018 chungah zeitindah caan na hmang lai i zeitindah caan na donghter lai timi hi lunfim tein ruah a biapi. Hi vawlei ah kum zeizat dah na nun timi nakin na chungah zeitindah caan na hmang timi hi Pathian nih a biapi ah a chiahmi a si.

Rev. Dr. Hre Kio nih “Kei cu Pathian caah lawyer- ေ႐ွ႕ေန ka si. Thih zong ka ngamh cang. Midang caah rian ka tuanmi a tam pah cang tiah ka ruah” a ti. Midang caah nun le lunglawmh tein thih i ngamh cu a sunglawi tuk. Na hram thawk ah ngaichiatnak le mithli tlaknak um ko hmanh seh, minung sining tuanbia a thleng khawh tu na biakmi Pathian a um kha philh hlah. Midang caah thei a tlaimi si i zuam, na donghnak theitlai zong thlum hram ko seh. "Na thawknak cu hme hmanh seh law, na donghnak lei cu a ngan tuk lai.” (Job 8:7)