Baptist Church Nih Laam, Hallelujah Le Amen Kan Uar Lonak

           Rev. Samuel Ngun Ling nih "Baptist Church Nih Laam, Hallelujah Le Amen Kan Uar Lo” tiah a chimmi bia lehnak. By:Victor Aung Thu Lin

Rev. Dr. Samuel Ngun Ling hi Laimi lakah kaa bochan ngaimi a si. Laimi tampi zong nih kan bochan ngaimi pakhat a si lai tiah ka ruah. LBC Silver Jubilee ah “Baptist Church Nih Laam, Hallelujah Le Amen Kan Uar Lo Nak” kong a chimmi ahhin chimhrinnak a si kho men. Hallelujah le Amen cu Baptist Khrihfa bu members le evangelists’ pawl nih an hman tuk. “Baptist a dirh tu cu "Jesuh" a si tiah a chimmi kongah amah (Dr. Samuel Ngun Ling) hrimhrim nih Muko Magazine ah a tialmi he chim ka duh.

1. Baptist Church Nih Laam, Hallelujah Le Amen Kan Uar Lo Nak: Dr. Samuel Ngun Ling nih, “Baptist Khrihfa bu cu minung nih dirh mi a si loh. Jesuh nih a dirh mi Khrihfa bu a si. Baptist cu kan laam loh, Hallelujah le Amen kan hmang tuk loh. Kan laam lo nak ruang le Hallelujah/Amen kan uar lo nak ruang cu Jesuh le Lamkaltu nih khan an rak hman tuk lo caah si. Kan chim cang bantuk in Baptist a dirh tu cu "Jesuh" a si bantuk in Jesuh hrim hrim nih a hman tuk lo mi si caah Baptist zong nih kan hman tuk ve lo nak si.”

“Lamkaltu pawl zong nih Laam, Hallelujah/Amen hi an rak hmang tuk ve loh. Amen an rak hman ning hna cu "Thlacam" dongh nak lawng ah an rak hman mi si. Cucaah Baptist Khrihfa bu cu "Ning cang te le Dawh cah tein" Pathian thang that hi kal ning si. Ning cang lo le Dawh cah loin Pathian biak cu Pathian hrim nih a duh lo mi si.”

1 Korin 14:33 zeicahtiah Pathian nih a kan auh cu ningcang lo piin um awkah si loin daite le rem tein um awk tu ah a si.

2. Rev. Dr. Samuel Ngun Ling nih a chim, “Khrihfabu timi hi Khrih nih a dirhtami a um lo. Bu dirh uh tiah a kan cawnpiaknak zong kan hmu lo. Khrihfabu poahpoah cu Khrih zumhnak ah dirhmi an si dih. Min tthattha zeitluk bunh len zongah min nih Khrih kha a lawmhter hlei lo. Khrihfabu hi a ngaingai ti ahcun min a ngei lo. Bible chungah Khrihfabu pawl min an ngei lo-Jesuh Khrihfabu, UPC, AG, Baptist ti bantuk, a um lo. Korin khua ummi cu Korin Khrihfabu an si ko. Efesa khua ummi cu Efesa Khrihfabu an si ko. Cucaah mirang khi an fim, USA First Baptist church, second Baptist Church an ti. Martin Luther nih a nun lio a chimtami cu kan thih tikah keimah min in zei bu hmanh nan dirh lai lo a ti. Khrihfabu ngeitu cu Jesuh Khrihfa lawng asi i, minung kan si lo, a rak ti. Nain, a thih hnuah a si kho lo an ti i Lutheran Church an dirh. Bu hi Pathian sermi a si lo, minung sermi lawng a si. Cucaah zei bu hmanh kha a hman deuhmi a um kho lo” tiah Muko magazine ah a tial. Muko Magazine i a tialmi ah a fian mi cu:

(A). Baptist Khrihfabu lawng hi Jesuh nih a dirhmi bu a si lo. Bible chungah Baptist Khrihfa bu hi Jesuh nih a dirhmi a si tiah a um lo. Samuel Ngun Ling nih a chim bantuk in “Khrihfabu pawl min an ngei lo-Jesuh Khrihfabu, UPC, AG, Baptist ti bantuk, a um lo. Korin khua ummi cu Korin Khrihfabu an si ko. Efesa khua ummi cu Efesa Khrihfabu an si ko.” Baptist Khrihfa bu lawng hi Jesuh nih dirhmi a si lo, Khrihfa bu paohpaoh cu Jesuh Khrihfabu lawngte an si dih.

(B). Baptist cu Hallelujah kan hmang tuk loh. Lairam ahhin Baptist Khrihfa bu dirh hmasa a si bantuk in nihin Missionaries le Evangelists zong Baptist Khrihfa bu an tam deuh tikah ka hmuh. Hallelujah hi Baptist Khrihfabu pawl nih an hmang tuk. For example, (Rev. Hoi Cung Tum, Rev. Dr. Tuan Peng Thang, Rev. Thawng Dun, Rev, Za Kian le Rev. Tial Uk te pawl hi Hallelujah an hmang tuk). Hallelujah cu sullam ngei tein kan hmang ahcun zeihmanh a poinak a um lo. Baptist Khrihfa bu member pawl a laam mi le Hallelujah a hmangmi an um ko.

(C). “Baptist cu kan laam loh, Hallelujah le Amen kan hmang tuk loh. Kan laam lo nak ruang le Hallelujah/Amen kan uar lo nak ruang cu Jesuh le Lamkaltu nih khan an rak hman tuk lo caah si.” tikah a chimmi cu one-sided in ka cohlan kho ko. Nihin, Laimi cheu khat cu revival (laam) le Hallelujah chim kho hi hrinthan ah kan ruah sual tawn. Hallelujah auh cu teinak a si tiah an chim theo, No! Hallelujah auh hi Khrih Thiang Thlarau thawnnak telh loin teinak hmuh kho a si lo. Khrih thlarau nih Hallelujah a kan chimh ter lawnglawng ah teinak cu hmuh kho a si.

1 Korin 14:26 in tanglei kan zoh tikah Paul nih Korin Khrihfabu pawl an i pumh lio ah ningcang tein an um thiam nakhnga a chimmi a si. Korin Khrihfa kong cu kan theih bantuk in Biakam Thar Khrihfabu lakah a buai ngaimi Khrihfa an si. Laimi Khrihfa he kan i lawh nak zong a um men lai, asinain context tha tein zoh ahcun aa dang. Cucaah, pumh lio ningcang loin kan um sual maw tiah chimhrinnak bantuk in chim ahcun aa dawh ngaimi a si hnga.

Kan chim cang bantuk in Baptist Khrihfabu lawng hi Jesuh nih a dirhmi bu a si lo, Khrihfabu poahpoah cu Khrih zumhnak ah dirhmi an si dih. Efesa cakuat ah Paul nih Khrihfabu cu Khrih pum a si. Khrihfabu cu Khrih pum a si i, Khrihfabu cu Pathian ta a si. Khrihfabu cu Khrih pum a si (Efesa 1:23; 4:12, 25; 5:23). Zumtu cu Khrih pum nge kan si (4:16; 5:30; 4:25). Khrih cu Khrihfabu lu a si (1:22; 4:16). Khrih cu Khrihfabu lu a si ti cu Khrih cu Khrihfabu uktu asiloah nawl ngeitu (5:23) asiloah cawmtu le zohkhenhtu (5:29) tinak a si. Jesuh nih zei bu hmanh a dirhtami a um lo. Khrihfabu cu minung ta zong a si lo, Jesuh Khrih ta si.