Na Thinhunnak Na Tei a Hau. “Overcome Your Anger”

“Minung thinhunnak nih Pathian tinhmi dinnak kha a chuahter lo” (James 1: 20) “Mi vialte hi a thinhung khomi kan si dih; a thinhun bal lomi cu, mithi lawng a si. Cucaah thinhun cu thil fawite a si. Sihmanhsehlaw, thinhun hnawh awk a tlakmi minung sinah a zatawk tein, thinhun a herh lio caan teah, a ruang a dikmi te he, a hmanning tein thinhunkhawh cu mi vialte nih kan tuahkhawhmi a si lo; cu bantukin thinhun cu a fawi lomi a si. Vawlei cung minthang pakhat simi ‘Joyce Meyer’ nih a chimmi cu “Thinhunnak hi zeihmanh thathnemnak a chuahpi lo” a ti. Cucaah, na thinhun tiah zei ruangah dah ka thinhun tti kha bia hal lengmang.

“Na thin a hun ahcun na thinhunnak kha sualnak chung i an luhpitu siter hlah; cun na thinhunnak cu ni tlakter hlah” (Ephesians 4:26). Thinhunnak hi caan tawi hrutnak a si. Cucaah na thinhunnak kha i uk khawh i zuam. Na thinhunnak na tei lo ahcun amah nih an tei lai. Na thinhunnak na tei lo ah cun, na nun nain amah nih na nun an ei lai. A dammi pum cu thinlung caah khualriahnak innkha a si; a dam lomi pum cu thinlung caah thonginn a si. A dam lomi thinhunnak cu zawtfahnak nganpi chuahpitu a si theo. A nun pengmi thinhunnak cu taksa le thlarau rawhtu an si. Cucaah thinhunnak cu ttih a nun ngaimi thil pakhat a si. Na thinhunnak kha na damter khawh lo si cun, Satan hriamnam pakhat bangtuk ah a cang lai. Thinhunnak cu mipi nih hmuh piak khawhmi thil a si lo, nanmah lawngin na buai ko. Bawi Jesuh nih a kan cawpiakmi cu “Na u nau cungah na thinhun ah cun biaceihtu hmaiah na chuah lai” tiah a ti. Na thinhunnak nih midang nunnak fahnak a pek khawh. Kan thinhunnak a rua bik cu kan duhning in thil a si lo caah kan thinhun. Ruah awk a ummi cu, na duhning paoh in thil hi kal dih seh law, Nanmah hi Pathian na si cang lai. Pathian na herh ti lai lo.

Zeiruangah dah na thinhun? A ruang pakhat cu keimah ka ruahmi, keimah ka tuahmi a tha bik tiah lungput na ngei caah a si. Nangmah na duhmi lawng a tha bik tiah na ruah si ahcun mibu he rian na tuahti khawh lai lo. Nangmah na lungput a tha lo tinak si. Na thinhun tiah na sum kho lo ah cun na sum zungzal. Vawlei cung minung vialte hi palhnak a ngei dihmi kan caah, kan nih ngaihthiam awk si a ti. “A innchungkhar cungah thinhunnak a chuahtermi cu a donghnak ah cun zeihmanh a ngei lai lo” (Proverbs 11:29). Thinhunnak a um lonak innchungkhar cu chungkhar nuam cem a si.

 “Ruah set loin bia chimmi bia nih cu nam chunh bangin mi a chunh” (Proverbs 12: 18). Cucaah, chitkhat na thinhun ruangah bia tam tuk chim hlah. “That lonak kha i teiter hlah u, thatnak tu in that lonak kha tei i zuam u” (Rome 12:21). “Thinhunnak tehna, huatnak lungthin tehna, cu nan hlonh hirmhrim hna lai” (Kolose 3:8). “That lonak kha that lonak in lehrul hlah u, thluachuah peknak tu in va lehrul hna u” (1Peter 3:9). Na thinhunnak naa sum khawh ahcun mi vialte he a remhmi na si ko lai. Lung daihnak nih pum kha ngan a damter. “Bia nem cu nunnak thingkung a si” (Proverbs 15:4). Lungsau thinfual hi fimnak a si. “Mi vialte he i rem awk kha nan i zuam khawh chungin i zuam u.” (Rom. 12:18). “A Lungthin a uk khomi cu khuapi a latu nakin a tha deuh.