Praise & Worship Sullam (What is Praise & Worship)?

1. Praise and worship biafang fiangternak

“Praise & Worship” biafang hi lai holh in kan ngei rih lo. “Praise” ti cu “Thangthat” ti a si i “Worship” ti cu “Biak” tinak a si ko.  Mirang nih, “Praise is about God, worship is to God. Praise is opening up, worship is entering in. Praise is boldly declaring, worship is humbly bowing in the presence of a Holy God. Praise applauds what God has done, worship is honoring God for who He is” an ti. “Thangthat” ti cu Pathian kong kan thangthat a si i, “Biak” ti cu Pathian kan biak khi a si an ti. Cucaah, pumhnak ah Praise & Worship hla kan sa i caan kan hman tikah “Thangthat” he “Biak” he a sullam a ngeih a herh.

Rick Warren nih cun, “The heart of worship is surrender,” (Biaknak i a muru cu pum i up nun hi a si) a ti. Rom ca kuat 12:1 ahcun, “Pathian nih a kan zaangfahnak a nganmi ruangah hin, Pathian sinah a nung in pekchanhmi raithawinak bantuk in i pe tuah u; a rian ah aa pumpemi le cohlan awk tlakmi si tuah u; cucu biaknak taktak Pathian nan pek awk biaknak cu a si” tiah kan hmuh. Cucaah, worship (biak) ah ai telmi cu “Pathian sinah kan nun up le Bawipa kan nunnak kan pek, na duh bang in ka hmang ko,” kan ti a hau.

2. Praise & Worship aa thoknak

Praise & Worship hla aa thoknak “Contemporary Christian Music” kong kan zoh hmansabik lai. “Contemporary Christian Music” timi Khrihfa Chanthar Hla hi 1960s hnu lawng in a ummi a si. A hlan ahcun Hymns lawng lawng hi sak a rak si. 1960s hi vawlei cung tuanbia ah thil ropui tambik a can/chuah kum le chanthar aa thok kum a si. Chanthar hla ah father of Contemporary Christian Music” tiah an rak auhmi cu Larry Norman a si. “Pathian hi chan hlun mi a si caah Hymns zong hi vawlei hramthok ka i rak phuah cangmi a si hrim hrim lai,” tiah a hmet lio ah a rak ti tawn. A hung upa deuh i chanthar hla aw (rock music) a sak. A hla phuahmi lakah mi tampi nih an rak uarmi cu “I Wish We’d All Been Ready” timi a si i Luke 17:34-36 chung bia Jesuh Khrih ratthannak kong a si. Mah chan lila ahhin Revival (ahlei in Pentecostal movement) a hung tlung zu le sa le drugs ah aa ciahmi mino tampi a lung an rak i thleng i biakinn an phan. Pentecostal movement a um deuhnak hmun tam deuh ah hymns sak lo in contemporary Christian Music hla sak hi a karh a rang deuh.

3. Zeiruangah dah Praise & Worship kan herh?

Pathian cu a sinak ai thlen lo nain a riantuannak hi aa thlen lengmangmi a si. Khrihfabu chungah P&W kan herhnak bik a ruang cu (1) chanthar music cu mino hna nih an hmanmi holh a si caah a si (Contemporary music is the language young people speak). (2) Traditional pumhnak hmun paohpaoh ah mino an zor chin lengmang. A tlangpi in chanthar pumhnak (Praise and Worship hmannak) tu ahcun mino an karh. James Emery White nih cun, “many churches that changed styles to using more contemporary Christian music, appeared to have a quicker growth” a ti. Cucaah mino tampi nih Jesuh Khrih sin an phanh khawhnak le Khrihfabu a thanchonak ding caah cun Praise &Worship hi a biapi ngaingaimi ah a cang. Salm 40:3 ahcun, “Hla thar kha a ka cawnpiak, ka Pathian thangthatnak hla kha a ka cawnpiak. Hi thil cu mi tampi nih an hmuh lai i Bawipa kha an i bochan lai” tiah kan hmuh.

4. Zeitindah Praise & Worship kan hman lai?

A biapibik pakhat tu cu: zeibantuk hla kan sak zongah Pathian nih a cohlanmi a si a hau. Pathian nih a cohlan mi biaknak cu pahnih lawng lawng a um. Johan 4 chungah Bawi Jesuh le Samaria nu tikhor kam ah bia an i ruahnak kong kan hmuh. Samaria nu nih, “Saya, Judah mi nih Pathian cu Jerusalem ah an biak, kannih Samaria tu nih cun hi Gerizim tlang ah Pathian kan biak,” tiah a rak ti. Jesuh bialehnak cu khuaruahhar a si: “Minu, ka chimmi hi zum; mi nih Pathian cu hi tlang ah siseh, Jerusalem ah siseh an biak lo caan a phan lai. Sihmanhsehlaw Pathian a bia taktakmi nihcun thlarau le biatak in an biak caan kha a ra lio i hika hi a phan cang. Hi bantukin a biami hna hi Pathian nih a duhmi cu an si. Pathian cu thlarau a si i a biatu hna nih cun thlarau le biatak in an biak awk a si” tiah a ti. A biapibikmi cu “thlarau le biatak” in Pathian biak lawng lawng kha a si ko.

John R. Bisagno nihcun, “Jesus tells us only two things are essential to acceptable worship. First, it must be in spirit. That simply means it must be sincere; from your heart. Second, it must be in truth, based on the Word of God” a ti. “Thlarau” a timi hi “Thiang Thlarau” he cawh sual lo ding a si. Pathian muisam keng kan sinak a langhtertu “kan thlarau” nih Pathian a thangthat ding a si. Ca thiang nih, “Bawipa na Pathian cu nan lungthin dihlak le na nunnak dihlak le na thazang dihlak le na ruahnak dihlak in na dawt lai (Luka 10:27)” a timi nih Pathian kan biakning cuai a thlai. Pathian cu lungthin taktak tein biak ding. Lungthin um lo i Pathian thangthat cu thangthat a si lo.

Adonghnak ah, Praise &Worship a hruaitu le a satu dihlak nih cinken a herhmi cu: “Hla/Music hi kan i tinhmi kawltung a si lo, Pathian kan biaknak ca i kan hmanrua a si” (music is not the goal, but a means to worship God). Mi cheu khat cu Pathian kan thangthat tikah kanmah dihriam or siaremnak in a kalmi kan tam tuk. An duhmi hla sak lo ahcun thinhun, aipuan bantukin um. Pathian duh ruangah si lo in hla/music duh ruangah Pathian thangthat le biak hi tih a nung ngaimi a si.

Reference: Rev. Lal Cung Awi, Praise & Worship

Credit: Chin Broadcasting Network