Mah le Mah i Thah Cu...

1.      Mah le mah i thah cu- sertu Pathian dawtnak le a vel theih lo ruangah a si. Minung a kan sertu Pathian dawtnak hngalh fian lo ahcun, ruahchannak taktak hi a um kho lo. Khrihfa nunnak i a muru pakhat cu “ruahchannak” a si. Cu bantuk ruahchannak a ngeimi hna cu Pathian dawtnak le vel a hngalh fiangmi an si. Kan i ruahchanmi cu minung thazaang thawnnak cungah aa hngatmi si loin, Abraham sinah a biakamnak a rak tlintertu Pathian cungah a hngatmi a si. Cucaah, hmailei ruachannak nganpi he Paul nih, “Khrih thawngin thil zeipaoh ka tuah khawh ko hna” tiah a ti (Phi 4:13). Pathian dawtnak a hngalh fiangmi cu a chungah zungzal nunnak petu cerhti Pathia Bia a um caah ruahchannak he a nung i amah le amah thah ding in khua a ruah bal lo.

2.      Mah le mah i thah cu- hrut ruangah a si. Dawtmi mitthli hnawh piak tu le hnemtu tha si i zuam loin, mitthli va tlak seh or va tuar seh timi lungput ngeih cu thluak tlin lo pawl ruahnak a si. Pathian ca’h nunnak pek tiang in kal ding le ram le miphun caah nunnak pek in riantuan ding tampi lakah mah le mah i thah cu a pam kho tuk! Harnak pakhat khat ruangah mah le mah nunnak i lak cu hrut pakhat a si. Harnak teitu cu mifim an si. Mifim cu harnak a tonmi tei kho aa zuam i, cun a tei khawhnak dingah ngandamnak zong a kawl chih. Ka thih hnu ah ahodah a rak ttah lai timi kha ruah hlah. Ka nun chungah midang caah zei rian dah ka tuan khawh lai timi tu kha ruah deuh.

3.      Mah le mah i thah cu- dawtnak dik ngeih lo ruangah a si. Mah le mah nunnak i lak cu chungkhar zawnruahnak le dawtnak taktak ngeih lo ruangah a si ko. Pasaltha cu thih ngam a si lo, nung i ngamh tu khi a si. Kan duh-dawtmi nungak caah harnak le retheihnak tuar ngam in nun kho khi pasaltha nih a ngei dingmi lungput bak a si tiah ka ruah. Kan taksa a dam lo hmanh ah kan lungthin khuaruahmi cu kan dawtmi hna caah a dam peng ding a si. Dawtnak dik cu a cawlcangh pengmi a si. Cawlcangh loin maw na dawtmi thih tak i timh hlah ci. Na ngeihmi dawtnak cu chungkhar le darling cungah nung ter peng ko.

***- Pasaltha tiah kawhmi Martin Luther hi biaknak ruangah lungretheih le thinphang ngai in a rak nung vemi a si. Mi nih an ka thah sual lai tikah Wartburg Castle timi inn pakhat ah kum khat chung aa thuh. Cu tluk in lungretheih le thinphang in a um hnuah a chimmi cu, “Thiang Thlarau umpi nak thawng in, Pathian kong ka ruahnak le a kong ka tial nak ah kaa (busy) manh lo tuk i a tuah in tuahmi sualnak ka tuah manh lo, misual ka si ko nain,” tiah a ti. Misual ka si a ti ko nain sualnak ka tuah manh lo timi bia cu duh a nung taktakmi a si. Harnak na ton caan ah nangmah lawng in ttah le khua lawng ruat hrimhrim hlah. Na tha a ba chin lai. Um sawhsawh nih lungthin a zawrter i depression a karhter. Cucaah, Martin Luther bantuk in manh lo ngai in riantuan i zuam, thil pakhat tuah ding kawl. Na rian i tamter. Manh loin riantuan ding tampi ngeih hi sualnak chung in luatnak lam pakhat a si. Na nun cu Pathian Bia nih an hruai seh law, an uk hram ko seh!!****

Note: A thih ciami hna caah chimh duhmi (aim) si loin, a nung lio mi mino hna nunzia kan thiam khawh nakhnga thazaang peknak caah a si.