WILLIAM CAREY (1761-1834 A.D) TUANBIA

“Pathian sinin thil lianngan i ruahchan law; Pathian caah thil lianngan i zuam.”

Khrihfa a rak dirka ah Khrihfa mi hna nih thawngttha bia chim ding rian fialnak a simi khua zakip ah kal in miphun dihlak zultu ah ser dingmi hi biatak tein an rak i zuam. Kum zabu (3) hrawng i Rome uknak tang ah a ummi hmun pawl le Europe ramchung hna ah Khrihfabu dirh an si hna i thawngttha bia zong hlawhtling ngai in rak chim a si. Mah hi hnu ah missionary rianttuannak hi a zor i tampi rianttuannak kong hmuh khawh a si ti lo. Asinain kum zabu (15) chung ah Catholic missionary rianttuannak cu India ram ah hmuh a si tthan. Cu lawng siloin kum zabu (17) in (19) chung karah Protestant missionary rianttuannak hi vawleicung ram tampi ah an tthawng ngaingai. William Carey hi protestant Khrihfa rianttuantu a si i amah cu India ram ah mission rian a ttuanmi a si. Amah hlan ah Protestant Khrihfa missionary rianttuantu Bartholomes Ziegenbagh le Henry Plutshau (1760 kum) ah India ram Tamilnadu state ah a voikhatnak bik Protestant missionary rianttuan dingah an rak phan. Hi hna pahnih hi Protestant Khrihfa lakah ramdang missionary rianttuan dingah Demark siangpahrang nih an thlah hmasa bikmi hna zong an si.

William Carey cu a rianttuannak ah a tlamtling tuk hringhran i chanthar Mission Pa tiah auhmi a si. Amah cu (1761 kum) ah Northampton pawng Engaland ram ah a chuak. A pa cu thiamtak rianttuan mi, sifak chungkhar in a tthangmi a rak si. Kum 12 a si ah a sianginn kai ai din i dum congtu rianttuan a thawk. Sihmanhsehlaw takpum chung damlonak ruangah dumcong rian zong caansau a ttuan kho loh. Cucaah kum 16 a si ah pawcawmnak caah Keden sernak ah Kedenh tthit rianttuan ai rak i ot tthan. Amah cu Anglican Church zumhnak he a tthangmi a si. Lungthlennak taktak cu revival pawl pumhnak ah ai pumhnak in a hmuh. William Carey cu sianginn kai kho loin um hmanh sehlaw cawnnak lei hi a duh tukmi a si caah Grik, French, Dutch, Latin le Hebrew holh pawl hi tuante in cawn hram a rak thawk diam cang.

1781 kum ah Carey cu Dorothy amah nakin kum 5 upa deuhmi hen an i tthi-um. Carey cu 1785 kum ah Moulton Baptist Khrihfabu ah Pastor rian a ttuan. Kum 2 hnu ah Leichester Pastor caah chiti thuh a si. Khrih rian fialnak (Great Commission) hi lamkaltu ca lawngah siloin nihin zumtu ca zongah a si tiah Carey nih a zumh. Hi a zumhnak cu upa pakhat nih hiti hin a ti, “Pathian nih midang lung thlen a duh ahcun nangmah bawmhnak tel loin a tuah khawh tuk,” tiah a ti.

Carey nih cauk pakhat ‘Captain Cook’s Voyages’ a relmi ah ramdang mission rianttuannak hi Khrihfabu rian biapi a si timi kha a rak hmuh. Carey nih mission rianttuannak a duhnak he pehtlai in ca pakhat a ttial. Cu ca a ttialmi chungah cun thawngttha a thei lomi thlennak a herhning a langhter. Nikhat cu Carey nih Isaiah 54:2 chungin thawngttha a chimmi ah bia roling pakhat a chim. Cucu, “Pathian sinin thil lianngan i ruahchan law; Pathian caah thil lianngan i zuam,” ti kha a si. Baptist Missionary Society dirh a si i an i tinhmi cu India ram ah mission rianttuannak ngeih ding kha a si. John Thomas, amah cu Baptist Khrihfa, Tilawng ralkap a si i, Baptist Missionary Society ah a luh ve caah amah hi India ram mission rian caah a kalmi lam hmuhsaktu ah a ttha lai tiah an ruah. A ruang cu John Thomas cu India ram Bengal ah a kal ding a si.

Cu tikah Carey nih John Thomas India ram zulh dingah biakhiahnak a tuah. Sihmanhsehlaw Carey thimhtuahnak cu a chungkhar pawl nih fawite in an cohlan piak lo. Apa le bang nih cun mihrut tiah a ti. Hi lio caan ah a nupi cu fa palinak a ngei dingmi a si i; Carey timhtuahnak cu a nupi nih a cohlang kho ve lo. Zeica’htiah hmunhma thar, khuacaan chiami hmun um ding a ruah ah a celh in a celh loh. Cu lawng siloin India ram kalnak ah thla 5 chung khualtlawn ding hi a ruah ah a thinlung in a rak cohlang kho hrimhrim lo. Sihmanhsehlaw Carey nih a nupi tel lo zongin India ram ah ka kal lai tiah ai tim tthiamtthiam. A thinlung a tthum hlei lo.

Hi lio caan ah Baptist Missionary Society nih India ram missionary kal dingmi caah bawmhnak fek an ngeih lo caah Carey India kalnak ah caan tlawmpal a tlai. Carey nupi nih fa a ngeih hnu ah Carey timhtuahnak a lungtlin ve tthan tikah June 13, 1793 kum in India ram rat an rak i thawh i, 19 November 1793 ah India ram an phan. East India Company nih mi zei missionary hmanh an kongah teltumter an duh hna lo caah missionary Calcutta ah a rak phanmi an rak lawm hna lo. Cu caah Carey le a chungkhar cu Malda ah an um. Carey nih India ram a phanhka ah harsatnak phunkip a tuar. Phaisa lei in an harsa tuk hringhran.

1794 kum ah a fapa Peter kum 5 a simi Chungtlik zawtnak in a thi. Mah hi thil cangmi nih a nupi Dorothy lungkuai le lungzur tuk hringhran in a chiah. Khuacaan hi an caah cun tuar a rak har ngaingai. Carey nih hi tihin ca a ttial “Hmunhma thar ah keimah lawng ka phan. Khrihfa hawi hohmanh an um lo; chungkhar lian kan si i, kan herhnak bawmchantu kan ngei lo. Amah (Pathian lawng) cu kan herhmi tlinnak a si.” Carey nih Bengali holh cawnnak ah suimilam tampi nikhat ah caan a pek. Kum 7 chung Malda ah an um. Mi tampi sinah thawngttha bia a phuan ko nain lungthlen mi a hmu kho hrimhrim hna lo. Amah cu Baptist Church ah mirang minung 4 sinah Pastor a ttuan. Hi lio caan ah Indigo sehzung ah chungkhar caah le mission rian herhnak caah rian a ttuan pah chih.

Kum zabu 19 thawk in Carey sining a ttha lei deuh in a hung i thleng. Malda in Serampore hmun, Chaklei Calcutta ah an i tthial. A ruang cu East India Company nih hnahnawhnak pek lo dingah ti a si. Serampore Tio missionary rianttuannak thawk dingah England ram in Joshua Marshaman le William Ward cu Carey rianttuannak ah an rak i tel ve. Serampore ah missionary pathum nih missionary umnak inn an thawk i missionary minung 10 le hngakchia minung 9 an um. Hi an tthutto ning cu hlanlio Khrihfa tthutto ning bantukin an ngeihmi an i hrawm dih hna. Carey cu rian teima mi le mi lungsau ngaingai mi a si. A ngeihmi vialte thawngttha caah a pek dih. Cun phaisa dik loin a hmangtu John zong a ngeihthiam. Carey cu a calehmi ah teima tein rian a ttuan.

A hmasabik ah Bengali holh in Baibal a leh i cu hnu ah Sanskrit le Marati in a leh chap. Baibal dihlak hi holh phun 6 in a leh i Baibal cang tete a lehmi cu holh phun 34 a si. Khuaruahhar thil pakhat a simi cu hi tluk in Carey hi holh thiamnak leiah pahrang a ngei ko nain a secretary pa Andrew Fuller nih Carey cu mirang ca biafang le grammar a palhnak ah a mawhchiat lengmang ti a si. Midang Khrihfa canter hi thil fawi lo taktak a si. Avoi khatnak ah minung pahnih nih lungthlennak an ngei. 1803 ah India rammi minung 25 nih tipil an in. 1825 kum ah minung 700 nih Khrihfa biaknak an cohlan cang. Hi hnu ah Carey nih a thawngttha chimning Hindu biaknak a mawhchiatmi kha Khrih vailam thangtthatnak lei in a thlen.

Carey nih 1819 kum ah Serampore College cu rammi Khrihfa dirhnak le Evangelist rianttuantu hna cawnpiaknak caah sianghngakchia minung 37 in a dirh. Cu bu ah Fort William College, Calcutta ah a ummi ah holh lei cawnpiaktu ah rian a ttuan pah chih. Mah rianttuannak in phaisa a hmuhmi cu midang missionary rianttuanmi le Carey caah a rak bawmhchanh ngaingai hna.

Carey nih Serampore College a dirhnak cu Khrihfa caah ti’n a rak si, nain caan tlawmpal hnu ah Khrihfa si lomi pawl Serampore College ah an rak lut tikah William Carey cu a ngaihchia ngaingai. Carey cu ministry rianttuannak ah a tlamtling ngai ko nain a chungkhar nih an tuar ngaingai ve. A ruang cu a nupi Dorothy hi harsatnak a tuar tuknak ah le a fapa thih hnu in thinlung tamtling lo ah ai chuah. Cu caah Carey caah hnahawk ngaingai a si. A fale cu nu le pa nih tthate in an zohkhenh kho ti hna lo. Cucaah Mrs. Marshman nih Carey fale cu nu nih zonhkhenhnak bantukin a zohkhenh hna i nun chimhhrinak lei zong a ngeihpiak tawn hna. A thaisung Dorothy cu zualhma ngai in a rak zaw i 1807, kum 51 a si ah a nunnak a liam. Dorothy thih hi khatlei ah ngaihchia ngai a si ko nain khatlei ah missionary chungkhar nih rianttuannak caah a ttha lei a si. Zeica’htiah innkhan pakhat ah Carey nih calehnak rian teima takin a ttuan lioah a nupi mihrut nu cu khatlei innkhan ah heh tiah tthut bu in zei huaha lo ah a hrum-ai tawn ti a si.

Dorothy thih hnu thla 6 ah Carey nih nupi dang phunsang fanu Danish miphun a simi Lady Charlotte Rumohr tthit dingah biachahnak a tuah. Amah cu Serampore ah Pathian zum loin a rak rami a si. Mission umnak i pumhnak ah ai pum tawn i lungthlennak a ngei hnu ah Carey nih tipilnak a pekmi a si. Carey rianttuan hawi pawl nih hi nu tthit ding hi Carey caah an duhpiak lo nain Carey nih nupi ngeih a duh caah a nehhnu ah cun a tthit tthiamtthiam ko. Charlotte cu thil ti kho mi, mi thluakttha, holh leiah thiamnak a ngei ve mi a si caah; Carey calehnak le rianttuannak kip ah a bawmhchanh khawh ngaingai te.

Cu lawng siloin Carey fale caah nuttha zong a si fawn. Asinain Charlotte cu a chantawi caah Carey he an i tthitumhnak kum 13, 1821 kum ah a nunnak a liam ve. Kum 2 a rauh hnu, Carey kum 62 a si ah nuhmei nu amah nakin kum 17 a hngakchia mi Grace Hughes he an i tthi-um tthan rih. Hughes cu Charlotte bantukin mifim thiam a si lo nain Carey caah zohkhenhtu ttha taktak a si ve. Carey kum upat lei a si cang tikah damlo le zawtfahnak in a khat. Hi lio caan ah Hughes cu Carey caah zohkhenhtu ttha tuk a si. 1812 kum ah mission rianttuantu hna umnak mei nih a kangh i, Carey cattialmi pawl an kang dih cikcek. Carey nih kum tampi teimak chuah in rian a ttuanmi cu zankhat ah an ciam dih. Grammar cauk 2 le Bible cauk dihlak a leh cangmi hna cu mei nih a kangh hna. Asinain Carey nih a tlaumi dihlak cu a ttial tthan hna. 1827 kum an von phak tikah cun Denmark siangpahrang nih mahte in degree i pek khawnak nawl Serampore College hi a rak pek hna.

Carey cu mission lei rian lawng siloin nunphung lei rian zongah tampi rianttuannak a ngeih pinah 1818 kum ah Journalism chuahnak zongah rian a hawile he an tuah chih rih. Nunphung lei rianttuannak an ngeihmi hna cu fa thahnak kham, hngakchia hlawhhlang rianttuanternak doh, Sati phung (Sati phung timi cu va le thih tikah an ruak mei duahnak ah nun bu in nupi le kangh ve) tibantuk pawl hi an doh hna i Sati phung cu 1829 kum ah kham a si. Carey cu 1834 kum ah Serampore ah kum 34 rian a ttuan hnu ah a nunnak a liam.

Note: Vawleicung Miroling Cauk (By; Mang Hlei Cung) chungta lakchinmi a si.