EFESA CAKUAT IN KHRIHFABU FIANTERNAK

Biahmaitthi

A hmasa bik ah Khrihfabu hruaitu, pastors nih cun Efesa cakuat hi rel lengmang ding a si. Efesa cakuat ahhin Khrifabu i thit hruaitnak, chungkhar ngakchia le nu le va i upat thiamnak kong a chim. Efesa cakuat hi AD 60-62 hrawngah Paul nih a tialmi a si (1.1; 3.1). Paul nih Efesa khuami sin cakuat i aa timhmi cu “van i a ummi thil vialte le vawlei i a ummi thil vialte kha hmun khat ah pumh dih i Khrih kha an lu cem ah i ser” kha a si (1:10). Paul hmangin Pathian nih aa tinhmi aa muru cu Jentail mi le Judah mi hna kha miphun pakhat ah ser hnuah Pathian he fonh ding kha a si (2.11; 3.13). Efesa cakuat nih Pathian minung hna kha Pathian tinhmi ningin nun ding kha a forh hna i, cucu Jesuh ah pumkhat si i lungrual tein nun ding kha a si. Pathian minung hna cu pum khat kan si i Khrih he zong pum khat kan sinak kong kha Paul nih cakuat chungah fian tein a chim. Khrihfabu cu pum bantuk a si i Khrih hi kan lu a si (1.21-23; 4.15-16); Khrihfabu cu Khrih nupi kan si (5:32-33). Efesa cakuat in Paul nih fian tein Khrihfabu sullam a chim. Asinain, nihin ni tiangah Laimi cheu khat cu Khrihfabu tanh lawng kan thiam i kan fiang rih lomi cu Khrihfabu sullam hi a si ko rua tiah ka ruah. Efesa cakuat in Khrihfabu fianternak zoh hna u sih.

Paul nih Khrihfabu a Hmuhning

Khrihfabu cu Khrih pum a si (Efesa 1:23; 4:12, 25; 5:23). Paul nih Khrihfabu cu Khrih pum a si a timi hi Damaskas khua pawng i Jesuh Khrih he an i chawnhnak kha siseh law a lawh ngai. Damaskas khua pawng i a tluuk lio ah khan aw pakhat nih ‘Saul, Saul, zeicah dah na ka hrem?’ a ti. Paul nih ‘Ahodah na si, Bawipa?’ tiah a hal. Aw nih cun ‘Keimah cu na hremmi Jesuh ka si’ a ti (Lamkaltu. 9:3-5). Paul nih hin Khrihfa (bu) a hrem hi Jesuh hrem ah a ruat bal lo. Asinain aw nih ‘Keimah cu na hremmi Jesuh ka si’ a ti tikah Khrihfa (bu) hrem cu Jesuh hrem a si kha a vun hngalh i Khrihfabu cu Khrih pum a si a tinak hi a si ko lai. Hi nih hin Khrihfabu cu Pathian ta a sinak kha a langhter. Zeicahtiah Khrihfabu cu ‘Pathian mi hna’ an i pumhnak a si.

Zumtu cu Khrih pum nge kan si (4:16; 5:30; 4:25). Khrihfa (bu) hrem cu Jesuh Khrih hrem a sinak cu zumtu cu Khrih pum a nge kan si caah a si. Paul nih Khrih le Khrihfabu an i pehtlaihnak kha pum le nge an i pehtlaihnak he a tahchunhnak nih biatak a langhtermi cu zumtu le Jesuh Khrih aa then thiam lo ti hi a si. Pum tengnge a simi kut le ke cu pum he an i then ahcun an thi, rian an tuan kho ti lo. Cu ve bantuk in zumtu cu Jesuh Khrih he kan i pehtlaihnak a cah ahcun kan thi ve (2:1, 12). Zumtu le Khrih aa then khawh lo bantuk in zumtu le Khrihfabu aa then kho lo, zeicahtiah Khrihfabu cu zumtu hna nih sakmi a si. Malaysia ka um lio ah mipa pakhat cu ka hrinthan cang/khamhmi ka si cang tikah testimony zong a chim ko nain pumh a huam lo, member fee zong a pek duh fawn lo. Efesa cakuat ah Paul nih zumtu cu pum tengnge kan si a ti. Cucaah mi pakhat cu ‘Jesuh Khrih cu ka Bawipa le ka Khamhtu a si’ tiah a cohlang i Khrihfabu ah um a duh lo ahcun, cu pa cu a paingthar a zum taktakmi a si bal lai lo. Mit in hmuh khawh lomi Jesuh Khrih he zumhnak in kan i pehtlaihnak a langhnak pakhat cu a pum a simi Khrihfabu he kan i pehtlaihnak hi a si. Khrih pum a simi Khrihfabu he kan i pehtlaihnak cu member kan sinak lawng si loin kan chawva kan peknak zong in a si. Khrihfabu ah kan chaw kan pek tikah Khrihfabu ah kan thinlung a um, zeicahtiah kan chaw a umnak ah cun kan lung zong cu a um ve (Mat. 6:21).

Khrih cu Khrihfabu lu a si (1:22; 4:16). Khrih cu Khrihfabu lu a si ti cu Khrih cu Khrihfabu uktu asiloah nawl ngeitu (5:23) asiloah cawmtu le zohkhenhtu (5:29) tinak a si. Hi nih hin a langhtermi cu Khrihfabu a thannak taktak cu Jesuh Khrih ah a um ti hi a si. Hihi Paul nih 1Kor. 3:7 ah fiang tein hitihin a chim: A ci a tuhtu le ti a toihtu thamtham cu biapi kan si tung lo. Pathian kha pei biapi cu a si cu, zeicahtiah amah nih khan pei a thanter cu. Khrihfabu thannak ah minung kan biapi lo tinak a si hrimhrim lo. Pathian nih thil lianngan a tuahmi hna hi minung hna hmang in a tuah ko hna. Minung nih Pathian thil lianngan tuahnak ah kan bawmh tinak cu a si lo. Pathian tu nih amah sungparnak caah hriamnam ah a kan hmang.

Laimi phun Khrihfa kan sinak hi kum za renglo kan hun kal cang nain Laimi cheu khat kan zumhning le kan hmuhning aa palh ngaimi cu, Pathian Bia (Bible) nakin thawngtha chimtu minung bia kan ngai deuh tawn. Kan zumhnak hi kan lu simi Khrih cungah bunh loin Khrihfabu hruaitu cungah kan bunh i, cu hruaitu pa cu buainak pakhatkhat ruangah bu dang ah aa thial tikah amah hnu zulh kan hman tawn. Khrihfabu hi Khrih kha si ko timi fian tein hngalh ko ahcun bu dang zongah thial a hau lo. Rev. Dr. Samuel Ngun Ling nih a chim, “Khrihfabu hi a ngaingai ti ahcun min a ngei lo. Khrihfabu paohpaoh cu Khrih zumhnak ah dirhmi an si dih ko. Min tthattha zeitluk bunh len zongah min nih Khrih kha a lawmhter hlei lo. Bible chungah Khrihfabu pawl min an ngei lo-Jesuh Khrihfabu, UPC, AG, Baptist ti bantuk, a um lo. Korin khua ummi cu Korin Khrihfabu an si ko. Efesa khua ummi cu Efesa Khrihfabu an si ko.” Khrihfabu cu Khrih kan zumhnak in dirhmi a si. Khrihfabu min cu minung nih phuahmi a si ko.

Paul nih Efesa cakuat ah Khrihfabu lu cu Bawi Jesuh khrih a si a ti. Cun Paul nih a chim thanmi cu nannih cu Khrih pum tengnge nan si a ti. Cucaah Efesa cakuat ah hin Paul nih Khrihfabu cu Khrih pum a si i cu Khrih pum a simi Khrihfabu a thantertu taktak cu Khrihfabu lu a simi Khrih kha a si ti kha a langhter. Cun, zumtu hna zong Jesuh Khrih nih kanmah he aa tlaak ning cio in pahrang a kan peknak ti zong kha a langhter fawn. Cu kan pahrang cio hman kha Khrihfabu a lam kip in a thannak cu a si. Cucaah, fim-thiamnak pahrang kan ngeimi hna hi mah pumpak thatnak ca lawng hmang lo ding kha Efesa cakuat hmanin Paul nih a kan cawnpiak.

By: Victor Aung Thu Lin

Baguio City, Philippines.