Zeitindah Midang Cungah Bia Na Chim?

1. Facebook cungah bia chimh le caan hman ning:

Facebook cu minung pakhat lawng in hman awk a ttha lomi technology pakhat asi. Midang he pehtliahnak, connection in sermi a si. Facebook cu private mi pkhat lawng in hman thiam a si lo caah bia chim le post hi i ralring ding asi.

1.      Facebook hi midang cung i, lung tling lonak le thinhunnak kong post ding a si lo. Mi pakhat cungah na thinhun or chimhrin na duh ahcun inbox/ messenger in cakuat ko.

2.      Facebook hi mi thangchianak, mi soiselnak le miphun thleidannak caah hman lo ding.

3.      Facebook hi nangmah na sining vialte langhternak hmun a si lo.

4.      Facebook cungah na feeling kong kha tam tuk chimh lem hlah, a ruang cu na bia chimh mi nih na ziaza chia le tha a langhter.

5.      Facebook cungah hin, kanmah nakin mifim, mi thiam tampi an um caah zoh dawhmi post ding.

 Mi vialte hi mah tein thil tuah khawhnak kan ngei cio, sihmansehlaw, freedom hi hman kan thiam lo ahcun kan nun a hrawh tertu asi. Kan thil tuahmi hi midang caah tthahnem mi siseh law, midang lunglawmh tertu si hram seh! Facebook cungah na feeling kong tam tuk chim nakin harnak chungin an khamhtu Jesuh dawtnak kong chimh hi a tha deuh. Online caan na hman lio ah, na hawikom herhmi kha philh piak hlah. Facebook hi na hawikomh nakin a biapi deuh ah i chiah lo ding. Online chungin kan nih kom ngaimi hawi nakin kan pawng te ah a ummi kan hawikomh hi an biapi deuh.  

2. Pulpit cungah bia chimh le caan hman ning:

Mi cheu cu pulpit hi mah tthanak kong chimhnak le mah min thangnak caah caan kan hmang. Pulpit cu hmun thianghlim a si lo nain, Pathian bia chimhnak hmun a si, Pathian tihzak buin caan hman awk asi. Mi cheu cu pulpit hi midang cung i lungtlinh lonak kong langhter hmunhma ah kan hman sual tawn.

1.      Pulpit cu- Midang cung i lungtlinh lonak le Khrihfabu cungah thinhung thaw chuah hnawhnak ah hman lo ding.

2.      Pulpit cu- Mi thangchiatnak, mi soiselnak le miphun thleidannak hmun a si lo, Pathian dawtnak le Jesuh riantuannak kong lawng chimh ding.

3.      Pulpit cu- Mah inn chungkhar khuasak ei le ding kong thawngthanhnak ah hman lo ding.

4.      Pulpit cu- Samsen sii le samnak sii thuh nak kong chimh cawnpiaknak hmun a si lo. Na duh ahcun hmun dangah personal in samsen sii le samnak sii thuhnak kong cu chim ko.

5.      Pulpit cu- Mi chiatthsernak bia chimh nak hmun a si lo. Upatnak le tangdornak in caan hmang ding.

6.      Pulpit cu- Midang nu/pa sual phawtnak caah Bible ca cang kawl i, remh lomi nu/pa denhnak le phomhnak ah hman lo ding.

7.      Pulpit cung in mi mawt chiat nak biafang nakin chimhrinnak le cawnpiaknak aw kha member pawl nih an herh deuh.

8.      Pulpit cu- Pastor nih member hna zawnruah sia herhnak lungput bia ding le a nungmi Pathian bia a luan nak hmun ah hman ding a si.

9.      Pulpit cu- Thlarau le tisa thazaang der thawm mi member hna caah thlarau rawl thaw le dam nak sii tha Pathian bia chimh nak hmun a si.

10.  Pulpit cu- Pastor hna nih, (a ttu run) member hna caah thlarau rawl cawmnak le zohkhenhnak caah a biapi bik hmun a si. Cucaah, kan zumhnak le kal ning he a khat lomi hna mi khual duh paoh in caan pek ding a si lo.

Laimi cheu khat pastors le evangelists nih kan palh tawnmi cu pulpit hi nawlngeihnak ah kan hman sual tawn. Pulpit cu chiatsernak hmun ah hmang loin, remhnak, daihnak Khrih nih misual, a kan khamhnak thawngtha bia auhpi nak hmun ah hman ding asi. Jesuh Khrih nun kan zoh tikah, Jesuh Khrih a sinak le a nunnak cu a dihlak in midang ca le Pathian caah a si. Kan tuahsermi vialte hi midang sualphawt tu si loin, midang nun thlengtu le midang lunglawmh tertu siseh law, midang he caan hman thiam i zuam hna u sih.
“Mi vialte he i rem awk kha nan i zuam khawh chungin i zuam u. Zumhnak ah thazang a ṭhawngmi kannih nih a dermi kha an thilrit phorh kan bawmh hna awk a si. Kanmah duhnak kha kan kawl awk a si lo.” (Rom 12:18; 15:1)